10 гадоў назад - 19-га верасьня 1991 году Вярхоўны Савет прыняў рашэньне пра новую дзяржаўную сымболіку - бел-чырвона-белы сьцяг і герб "Пагоня". Гэтае рашэньне віталі тысячы беларусаў на плошчы Незалежнасьці ў Менску.
"Самыя шчасьлівыя людзі ў сьвеце"
пад такім загалоўкам часопіс Newsweek напісаў, што тэракты ў ЗША пайшлі на карысьць некаторым палітыкам, адцягнуў-шы ад іх увагу СМІ й крытыкаў. Галерэю шчасьліўчыкаў адкрывае Лукашэнка: "Ён зноў прэзыдэнт Беларусі з 75% галасоў. Немагчыма, заяўляюць ягоныя апанэнты. Яго найвялікшы апанэнт, міжнародны друк, амаль не заўважыў".
Сярод іншых шчасьліўчыкаў - маніакальны прэзыдэнт Замбіі Робэрт Мугабэ, прэзыдэнт Паўднёвай Афрыкі Тхабо Мбекі, прэзыдэнт Францыі Жак Шырак і міністар абароны Нямеччыны, якіх абвінавачваюць у карупцыі, і амэрыканскі кангрэсмэн Гары Кондыт.
Аўтар "Божа, блаславі Амэрыку" зь Беларусі
У гэтыя трагічныя дні ў ЗША як ніколі часта гучыць песьня "Божа, блаславі Амэрыку". Яна настолькі папулярная, што яе лічаць другім гімнам. Але мала хто ведае, што аўтар гэтае песьні, кампазытар Ірвінг Бэрлін (Ізраіль Бэйлін), нарадзіўся ў Магілёве ў 1888 годзе. Яго сям'я эмігравала ў Аэрыку, калі яму было 8 год. Бэйлін пачаў працаваць як афіцыянт і сьпявак у рэстаранах. Гэта падштурхнула яго да напісаньня песьняў. Ірвінг Бэрлін - аўтар больш як 900 песьняў, некалькіх м'юзіклаў і музыкі да фільмаў. Шмат песьняў, такіх як "Няма такога бізнэсу, як шоў-бізнэс", "Парад на Вялікдзень", вядомых кожнаму амэрыканцу, напісаныя Бэйліным. . На Каляды ў Амэрыцы самая ўлюбёная песьня пасьля "Ціхай начы", гэта песьня Бэрліна "Мне сьняцца белыя Каляды".