Новы амбасадар ЗША ў Беларусі
Прэзыдэнт ЗША Джордж Буш абвесьціў пра намер прызначыць новым амбасадарам у Беларусі Джорджа Крола, які на пачатку 1990-х працаваў намесьнікам амэрыканскага амбасадара і часовым павераным у справах ЗША ў Менску. Прэзыдэнт Буш накіраваў ягоную кандыдатуру на зацьверджаньне Сэнату. Джордж Крол заменіць на пасадзе цяперашняга амбасадара Майкла Козака.
У амбасадзе ЗША ў Менску пацьвердзілі факт намінаваньня новага кіраўніка дыпмісыі, аднак пакуль ад камэнтароў устрымліваюцца. Не гавораць таксама, калі новы амбасадар прыбудзе ў Беларусь. Але відавочна, што працэдурныя справы займуць пэўны час. Цяперашні амбасадар Майкл Козак, напрыклад, два месяцы чакаў зацьверджаньня ў Сэнаце.
Майкл Козак працуе на пасадзе амбасадара ЗША ў Менску менш за тры гады, і беларускія ўлады ставіліся да яго з пэўнаю насьцярогаю. Спадар Козак прыбыў у Менск у кастрычніку 2000- га году, аднак даверчыя лісты змог перадаць А. Лукашэнку толькі 22-га лютага 2001-га году - Лукашэнка доўга адмаўляўся сустракацца са спадаром Козакам.
Намінаваны на пасаду амбасадара ЗША ў Беларусі Джордж Крол закончыў Гарвардзкі й Оксфардзкі ўнівэрсытэты, працаваў у амбасадах ЗША ў Менску, Кіеве, Маскве, быў дырэктарам Офісу расейскіх справаў Дярждэпартамэнту.
Спадара Крола ў Менску многія ведаюць. На пачатку 1990-х гадо ў ён быў намесьнікам першага амбасадара ЗША ў Беларусі Дэвіда Суорца, а пасьля ягонага ад'езду выконваў абавязкі часова паверанага ў справах.
Радыё Свабода