ВЯЛІКДЗЕНЬ У ТАРОНЬЦЕ
Летась сьмерць забрала
ў нас, таронцкае парафіі, Першага Ярарха
БАПЦ, сьветлай памяці арх.
Мікалая. Мяжа Канады, з прычыны вайны ў Іраку, адгарадзіла шлях нашых сьвятароў
да нас са Злучаных Штатаў. Як
сьвяткаваць Вялікдзень?
Згадзіўся дапамагчы нам
сьвятар а. Аляксей Калюжны
зь недалёкае ад нас парафіі,
што ў Тароньце на Манінг авеню.
Гэтая-ж парафія, якую "рускай"
называюць, некалі была
на вуліцы Глен Морыс. Беларусы,
што пасяліліся тут на пачатку мінулага стагодзьдзя яе
залажылі. Гэтак Канада нашых
праваслаўных суродзічаў з
акупаванае Масквою ці Варшаваю
Бацькаўшчыны ўключыла ў лік "рускіх".
Запрошаны намі а. Калюжны
служыў усяночную ў Віндсары,
а да нас зьявіўся ў сьвятыні
Сьв. Кірылы Тураўскага ў нядзелю
27-га красавіка а гадзіне
10-й. Сабралася ладная грамада
вернікаў. Ютраня і Сьв.
Літургія трывалі тры гадзіны.
Пасьля асьвячэньня вялікодных
дароў, абдымкаў і сьвяточных пажаданьняў у вялікай залі віталі й ушанавалі зорку беларускай
гістарычнай прозы,
выдатнай паэзіі, некалі старшыню
Саюзу беларускіх пісьменьнікаў, спн. Вольгу Іпатаву.
Ганаравалі яе далучэньнем у
сябры найстарэйшае нашае арганізацыі ў Канадзе - Згуртаваньня
Беларусаў Канады.
Вельмі прыгожа аформлены
дакумэнт уручаны быў нашай
дарагой госьці з падпісамі першага
Старшыні Галоўнае
Ўправы ЗБК Кастуся Акулы й
цяперашняе Старшыні таронцкага
аддзелу Надзеі Дробінай
такога зьместу:
Ганаровы Ліст
За неацэнны ўклад у разьвіцьцё беларускай літаратуры
й самаадданую працу на карысьць
беларускага народу надаць
спн. Вользе Іпатавай
тытул ганаровага сябры Згуртаваньня
Беларусаў Канады.
Вольга Іпатава, якую мы ўжо
на ўрачыстым сьвяце ўгодкаў
БНР 30-га сакавіка ахрысьцілі
ЗОРКАЮ, шчыра дзякавала
пасьля гучных воплескаў за такую
ўзнагароду. Вядома-ж, ейны
сын Руслан, прысутны на
сьвяце, пасяліўся ў Тароньце
колькі гадоў раней. Мы-ж запрасілі заслужаную Зорку беларускай
культуры наведаць
нас і ў будучыні.
К.